Сарыарқадай ел қайда, Жидебайдай ер қайда?

«Сарыарқадай ел қайда, Жидебайдай ер қайда?» деген халық нақылына айналған. Әредік аты аталып, бірді-екілі Жидекең айтыпты деген сөздердің «Ел ауызнан», «Шешендік сөздері» сияқты жинаққа енгізілгені болмаса толымды зерттеу жасалмаған. Жидебай Қожаназарұлы 1713- 1812 жылдары өмір сүрген.Өзіндік ерекше тарихы бар қазақ халқының жазба деректері мардымсыз. Ел есінде сақталған халық зердесінен өшпейтін мәліметтер шежіре қариялар арқылы там-тұмдап болса да бүгінгі күнге жетіп отыр. Өткенін зорлықпен ұмыттырмақ болған зұлмат заман да халықтың зердесін жоя алмады. Еліміз еркіндігін алып, өткен-кеткенін таразылап, жақсы менен жайсандарының аттарын еске ала бастады. Ел аузындағы аңыз әңгімелердің, шежіренің ақиқаты мен аңызын кейбір деректерге сүйене отырып, екшеп көрсе, әлі талай нәрсенің табылары мінсіз.